Translate

الأربعاء، 20 يوليو 2016

**** اشحال و اشحال ...من الحال **** زجلية بقلم ربيعة بومهراز


شحال و شحال 
و شحال ...
شحال ڭدك يا عييني ما تبكي
وخا تبكي دموع و دم
شحال ڭدك يا ڭلبي ما تشكي
و تهز مازال من الهم ،
الحال ما هو حال
ولا حال ...
كانت دار ف دوار
كانت بين اشجر و عين
و اصخر ،
و كان الزين بالصح زين
و امغنبر ،
و كانوا الرجال ارجال ب شان
و همة عالية ،
كانت العشرة عشرة ب حنان
و امحبة صافية ،
كان الحليب مدفڭ ف الجنان
والشكاوي دافية ،
الخير ناشر اجناحو ف الفدان
و العبرة وافية ،
الڭصعة و المخفية
لمانا اجميع
و محبة الميمة قوية
و احبل ارفيع
شاد عمدان ...
و اسواري ،
اموڭف حيطان
و احنا دريات و ادراري
يدي ف يد خويا
يد اختي انقية
و اتنڭي الشوك
من تحت رجليا .
زادت و ضاقت الحزة
و اقلال المال
اتكشفات ل من المعزة
و اصعاب الحال
كلها سامى اللي ليه
و غطى راسو ب اعصابة رزة
شلا احفاري بانت
ف امريرة ازمانا
و ليزار اللي واهلي كان
سترة و اغطانا
جات اعجاجة الخوف ڭلعاتو
و اجرات ... اجرات بيه
اجري يا ما تجري لهيه
و لهيه للثلث الخالي اداتو
ب الكدوب والبهوت صبغاتو
خدي لي كان نوارة بلعمان
ابهات ضوو و زاد اطفى نورو
ما هبط ثقلو كفة ميزان
ما تلا ل شوفتو ثمان
مللي يا وعدي ...
هاجت عليه ارياح ودخان
عطبوا لسان الحق
و ڭطعوا ب كثرة الدق
يد ساماتو جات اتداويه
اكبر احنش بو ضرڭة
و افراخو دايرة بيه
سمو ف نابو
و اضحكتو امصيدة
ل اقليل الفهامة
يطرز الهم
ب اظفر ملغامة
ايظفرو ظفرة ظفرة
و ب اعظم الغدر
يرسم ادموع الحڭرة
ايصوط و يقرق
على المتمورة
ديك لي احفيرها
كان امغرڭ
اليوم راها مهجورة
لسانو منجل
يحصد الفم الداوي
عاجبو حالو
عافس على احلاسو
واكل لحمو
ناكر أهلو و ناسو
يدردر الملح ع القروح
و الميمة امحاوطة اعليه .
مشات ايام...
و جات ايام و ايام
اتفك الحزام
اتفضح المنام
مول التدبير و الشوار
افتى اقضاه
ف ليل مضلام
بين سما(ء) و ما(ء)
على ديك الجبال العالية ،
اوريقة من الشجرة
ذبلات و طاحت ...
ترڭي و ب عافية تڭدي
كوات الڭلب
اعييت اتقاضى جهدي
و المكتوب اتقدر واكتاب
بان الفوت كيفوت
و انوڭلو فات
المركب غرقات
بلعاتها امواج
و انا على الخوف اتكيت
المواجع تتڭلب بين الضلوع
و الشط يا ويلي ابعيد
و ماني عوامة
و ما بان ليا...
يا و عدي ارجوع
امناشر العساسة
سايرة تڭطع
ف لحمي الموجوع
النفس فيا زحمت
و الكلام اصبح موسوع
ف ظهري دڭوا
مسمار امصدي
وشموه ب نقش المربوع
ڭيدوني ...
ب اڭال و اڭال
طيبوني ...
على اويڭد الصبر المقشوع
لحوني ...
ف بير احبل جرارتو مرفوع
و ما عندو ڭاع
طلعوني...
ب احبل الكتان
اسمحت ف الحب والتبن
و سحت هايمة
ف ابلاد الله
و الخوف خوفي
حاتل ف الحلق
و قاج احروفي .
علم ضوء النهار...
على راسي
و أنا يا وعدي اغشيمة
الطريڭ طويلة
و حاسبيني ابهيمة
شا...شا ، وڭفي
را...را ، زيدي
انياب فمي عاضة على الصبر
و ا شفار شوفي
حاضنة ادموع البصر
و الكلام اعڭر
الطبيب ما صاب ليه ادوى
ما صاب ساروت لمجر .../.
ربيعة بومهراز 4/9/2015 تازة

ليست هناك تعليقات:

إرسال تعليق