Translate

الاثنين، 17 أكتوبر 2016

آااه يا عيني / زجلية بقلم مقتطفات من قصيدة *سلطان الظلام*


آااه يا عيني
سيلي وگطري
نزلي على صدري
بكي وتفكري
اللي راح.
خللي دموعك
مكركبة ما(ء)
دايبة شحمة
من لحمة
تقهرت بالتشحاح.
رشيتي لكبيدة
عادت هشيشة
لا هي شديدة
لا هي معدن
تكمشت بالتفلاح.
راني يا بنادم
غي بنادم
لحم ؤدم
مانا ملاك
مانا جن
عندو سبع رواح.
جوارحي من غرقها
طلقت عروقها
سرحت عروشها
حتى الشوق
من كثرة شواقو
بسري باح.
ودواخلي من حرها
طفى ضوها
تقادى صبرها
عيات وتهدات
ؤملات بالتبراح.
لله يا هداك
را العقل مشى معاك
كيندير حتى ننساك
واش فيا ما يتلاح !؟.
ما بقيت مواتيك
ولا الكلام المعسول
اللي كنتي تگول
طلع بلول
كلو كذوب ومزاح.
لا تخلليني حاير
عارفني كيداير
ما تحتاج يشكرني حد
ما تحتاج يمدحني مداح.
ويلا كنت ظالمك
هانا جيتك
طالب ضيف الله
راغب فالسماح.
مقتطفات من قصيدة *سلطان الظلام*

ليست هناك تعليقات:

إرسال تعليق