Translate

الخميس، 24 نوفمبر 2016

الحب والعشق / زجلية بقلم ادريس جبيلو


حالي ياحالي واهياحالي
شوف فداك الجنان بين الدفالي
واش باقي شي زهر
نعصروه فوجه داك المنضر
يفوح عطرو سالب روح
هيمانة بين السواگي عطشانة
تلهت عل الحليب ودفى الحبيب
حالي ياحالي واهياحالي
شوف فدوك القبايل ؤوالي
واش كاين شي عشق مايتعشق
نحوزو ونعنگو بالحب والعشق
بجنبي ندگو وتد للخيمة
نربط فيه راسي الولهان
يرتاح صداعو ويگعد على گاعو
حالي ياحالي واهياحالي
شوف بين دوك الدوالي
واش باقي شي عنب
نعصروه فدم هاد الگلب
يسخن راسي ونعود نهتري
كي داك الدري فرحان
بالحليوة افمو اللي عطاتو امو
بقلم ادريس جبيلو

ليست هناك تعليقات:

إرسال تعليق