،، مَرْوَدْ لَ احْزَانْ ،، / بقلم الزجال حكيم البورشدي

احْلَفْتْ حَلْفَة فِوْدَنْ الرِّيحْ 

احْلَفْتْ إِلَى اوْڭَفْتْ
مَا انْطِيحْ 
وَيْلَا فَضْتْ مَا نْخَلِّي
الهَمْ مَنِّي ايْسِيحْ
احْلَفْتْ حَلْفَة
ڭَلْتْ نَخْرُجْ هَانِي
مَنْ شَرْ الوَسْوَاسْ
اگْبَلْ ما يْگَيَّدْنِي بِحْبَالُو
ڭََلْتْ نْبَرَّمْ اشْفَارِي
عْلَى خَدِّي
اڭْبَلْ مَا تَكْوِينِي
بِدْمُوعْ النَّاسْ
حْتَى ايْلَا غَابْ اخِّيِّي
نَتْرَجَّى الشُّوفَة فِاخْيَالْ مَنُّو
وَلَّا نَعْطِي نْهَارُو
بِاللِّي شَاطْ مَنِّي
احْرُوفْ مْخَبْلَة بْدَمِّي
 نَقْرَاهَا عْزُو يْحَدْ البَاسْ ،،

من زجلية مَرْوَدْ لَ احْزَانْ ،،
 بقلم الزجال حكيم البورشدي