مشا عام و جَا عامْ / زجلية بقلم فاطمة المسعودي

--------------------------------
مْشَا عَامْ و هَا عَامْ جْدِيدْ هَبّتْ رْياُحو
شُوفْ كِي كُنْتِي وْ كِي وَلّيتِي
شُوفْ سْنِينْ منْ عُمْرك فِينْ رَاحُو
الزْهرْ يَتْفَتّح وْ يَزْهَى نُوّارُو
وْ غَدّا تَلْقَى وْرِيقَاُتو طَاحُو
الْيُومْ انْتَ هْنَا وْ غَدّا رَاكْ الْهِيهْ
يَاسَعْدَاتْ مَنْ اجْعَلْ التّقْوَى
رَاسْ مَالُو وَ ارْبَاحُو
***
مْشَا عَامْ و هَا عَامْ جْدِيدْ هَبّتْ رْياُحو
شْحالْ منْ وَاحَد بَايَتْ مْقَصّر
وْ وَاحَدْ يَقَاسِي عَايَشْ فَ نْوَاحُو
وْ وَاحَدْ بالْفَرْحَة مَا قَدّو طُولْ الّليلْ
وْ وَاحَدْ بْطَا عْلِيهْ امْتَى يَطلَعْ صْبَاحُو
قُلْ لِي امْتَى الْبَرّانِي شَارْكَكْ فرحْتَك؟؟؟
حَتّى تْشَارْكُو الْيومْ فَ اعْيَادُو و افْرَاحُو
***
مْشَا عَامْ و هَا عَامْ جْدِيدْ هَبّتْ رْياُحو
كِيفْ نكُولْ الْعَام زِين و كُلْشِي بِخِيرْ
وْ الْعْدُو مَنْ وْرَايَا يْمَضّي فَ سْلاحُو؟؟
كِيفْ نرْقص عْلَى الْقَعدَة وَالْبَنْديرْ
وْ خُويَا فْ سُورْيَا مَاَزالْ مَا بْرَاتْ جْرَاحُو؟؟
كِيفْ نوَهّم نَفْسِي بالُّشوكْ يْوَلّي حْرِيرْ
وَ الْقُدْس مَازَالْ مَا طْلَقْ الله اسْرَاحُو؟؟
فِينْ الَعْرَبْ؟؟ فِينء اهْل النَّخْوَة و التّدْبِيرْ ؟؟
وَاشْ مَازَالْ حَيّينْ وْ لَا رَاحُو؟؟؟
 ------------ فاطمة المسعودي ----------