---------------------------------
شَفْت الْخُو
يَضْحَكْ فَ وْجَه خُوهْ
وْ ابْلِيس بِينْهُم يْطُوفْ
--
شَفْت الَغْنَمْ تَنْقُصْ
شَكّوا فَ السَّارَحْ تَهْمُوهْ
وَ الذِّيبْ وَسْطهَا
لَابَسْ بْطَانَة خْرُوفْ
--
شَفْت الْحُبْ بِينْ جُوجْ
مَا عَنْدُو قِيمَة ذَلُّوهْ
هَدَا يَفْتَحْ قَلْبُو
وْ دَاكْ يَرْشَكْ فِيه سْيُوفْ
--
شَفْت مِيزَانْ الْعَدْل مَايَلْ
وْ بَحْبَل الزّورْ شَنْقُوهْ
وْ قَالُو يَمْكَن
مَنْ قَلّة الصْرُوفْ
--
حْمَامَة السّلُام اغْتَالُوهَا
وْ حَتّى مَنْ رِيشْهَا نَتْفُوهْ
وْ دَمْ الْخَاوَة سَالْ
وْ بَعْد مَا كَانْ نْقِيْ
وَلَّا مَعْيُوفْ
--
شَفْت الْخَيْر
مَنْ مْطَامَرْنَا جَبْدُوهْ
وْ قَالُو مَا جَاتْ صَابَة
وْ حَلْفُو بَلحْلُوفْ
--
شْحاَل قَدْنِي نَحْصِي
هَا انْتُومَا احَسْبُوهْ
و شْحَال قَدْنِي نْشُوفْ
و الشّوفْ مَا يْبَرّد الجُّوفْ
-------------------------------- فاطمة المسعودي --------------
ليست هناك تعليقات:
إرسال تعليق