*** عْمَر ْجْديدْ *** بقلم الفنانة والزجالة فاطمة بصور

عْلَى وْجَهْ رَمْلَة سَارْدَة...

ارْسَمْتْ احْزانِي...
وْخَيّطّْْْْ فُم ْالضَّحْكَة لَمْشَرْگة
بَالْخَيْطْ الْبَاقِي..
مَنْ داكْ الْفُرْحْ الْمَخْطُوفْ
مَلِِّي زَهْرِي فاَقْ؟!
وَ لْداكْ لَبْحَرْ ارْمَانِي؟!
ابْقات ْلَحْروف ْفِيّا اتْشُوف
مَلِّي اتْهَرَّس ْكْلاَمِي فَالجُّوفْ
وْكَتْبَت ْعْلَى وَجْهِي:
يَاك ْالْولْف ارسَمْتُوهْ بْ جُوجْ؟!
ياك السّاگية الِّي مَاهَا
جَايَب ْعْمَر ْجْديد...
خلَاَّت ْبابْ لَكلام مَفْتُوحْ؟!
عْلاشْ اتْجَرْحُو خَاطَرْ الْفَرْحْ؟!
غَزْلو كْلاَم ْالرُّوحْ...
وْخَلِّيوْا سَرّْ الخَاطَرْ
بْ سَرُّو يْبوُحْ ...
عَار.ْ.. اتْعَگرُو خَاطَرْالْوَلْفْ
وَاتْخَلِّيوْا خَيْطْ الرُّوحْ...
مَنْ داكْ الشَّوْقْ يْرُوحْ؟!

الفنانة والزجالة فاطمة بصور: مجنونة الحرف والركح.