-----------------
دَنْدَنْ لَكْلاْم فْ صَدْرِي
كْلاَم ثَامَرْ
حَانْ حْصَادُو
--
دْرَسْت وَ بْدِيت نْذرّي
نْصَفّي لَكْلام
و نَعْزل هَاذو من هاذُو
--
اخْتَاريتْ لكْلام
اللّي يْعَري
يجُر لَغْطا عَلْ لَفْسَاد
وْ يَحفر عْلَى اوْتَادُو
--
خَرّجْت حْرُوفي مَن السْكَاتْ
وْ ڭَلت لِيها بَالله لمَا ڭَرّي
وصْفي هَدْ الزمان
و جِيبِي على مجَادُو
--
سَمْعتنييي الحْروفْ
جَاتْنِي تْجَرّي
جَدْبت عْلى الوَرْقَة
سَيْحَتْ لَقْلام
وَ تْخَبْطَت فَ مْدَادُو
--
وَ فْ وَسْط الجَدْبَة
ڭَالت لي الشّيطان مَا هُو ذَرّي
لْعَبْ بَزْمَانَا وَ هْدمْ عْمَادُو
--
كُلْ وَاحَدْ يْڭَولْ أرَاسِي
خَلّونِي نْعُومْ بَ بَحْرِي
يَظُنْ رَاسُو نْجَا
وْ هُوَ يجْرِي ف نْكَادُو
--
عَزْنَا هْجَرْنا مَنْ بَكْري
بْقَى غِيرْ الذّلْ
طْلَعْ وَ تْعَلّى عْلَى سْيَادُو
--
اللّي سْتَرْنَاه صْبَحْ مْعَرّي
غَرْنَا المَالْ
وَلّى كُلْشِي مَنْ عْبادو
--
بنادم تَاهَ عْلَ الدّينْ
وَ فْ هَمْ الدّنْيا يْبَرّي
وَ بْقَا لا دَنْيَا
لَا دِينْ يَجْعَلْ مَنُّو زَادُو
--
مَا زَالْ شَلّا كْلام
يْدَنْدن فْ صَدْرِي
كْلاَم تمْر وْ حَانْ حْصَادُو
--------------------------فاطمة المسعودي
ليست هناك تعليقات:
إرسال تعليق