قصيدة *گلبي الملعون* / زجلية بقلم Abdou Sultane Gassmy

يا گلبي الملعون شلا غرايب درتي فيا

من محنة لمحنة ما جبرت فيك محنة ما رعيتي ليا
شطناتني شطنتك والثقة فيك لعبت بيا
إييه...نستاهل أنا اللي درت راسي فيك...

اعطيتك قيمة ومل-القيمة اصبحت مگرد
وايامك الدليلة طويلة فيها نحسب ونعد
شحال شادة معايا الضد حلفات لا تتحد
عاطياك الويلة الطوع ودايرة يديها فيديك...

مغطي بحجاب العار مخرج فيا العجب
ولليت نسوى الجالوق بعدما كنت ذهب
اصبحتي عدويا يا العدو والزمان كايغلب
بغيت نعرف علاش مخلليهم طاغيين عليك...

منغص عليا العيشة ما گديتي تشفق
سرت جلافط الوجه تكمش واتشق
العقل ناض من بلاصتو حتى شبابي مني تسرق
حلفتي ما تحشم مسدتيني بالهم ودلكتيني دليك...

دبل نوار زمان اللي كان منو فدان وعروشو تشفاو فيا
ما سقت خبار تافات الفوت وجرى اللي جرى ليا
ضربة نازلة على ضربة وزدتي هراوتك تاهيا
من تريكة الگنوس عاد الفلوس الخنفوس يريش الديك...

يا گلبي الملعون مال بابك مترع اللي جا يدخل
يحلف خاون الروح مني لا يبان ولا يحصل
بلا دقان بلاما تگول شكون غير تجي وتحل
كيف اتبع هواك تخوني وانا مولاك على يديا مربيك...

ملوكو تصير مالكاني وملوكي طايعاه
تخليني نجدب نتحير لا جاوي مكاوي لا بخور طالقاه
وساعة نطيح يعيش گناوي سماوي طاير فسماه
عجبك حالي ما فكيتي خبالي هذا هو المضنون فيك...

يا القاطفني بلا جدر وانا وردة من جردة موردة
كاويني بلا زلاگ بخيتي ومصيتي ربوب الشهدة
واش المحبق يعيف الحبق ولا الصهد يبرد نار الغدة
ياك الذات نشفات ؤشحفات ويلا سقيتيها تسقيك...

هاز اعلامي مخيط شاشية باحلامي مزوقة بودع كلامي
والعين مللي عطشت شربت الدموع بكحل ايامي
طلعت القصيدة من جوف التنهيدة تحطت گدامي
وصمغ المحلة دوايتو گلة سبوبو من العلة يداويك...

يا اللي مشربني مرار الحر ماهو سم ماهو خمر
كاس بيه نغيب ونجيب العيب وكاس بيه نحضر
ؤبطاسة الحال نحيد تمن المحال والقطعة صبر
نهز كفوف العمر فسروية الفجر نطلب ربي يعفو عليك...

(للإشارة) كانت هذه إحدى القصيدتين اللتي شاركت بهما في الأمسية الشعرية الصوفية على إيقاعات گناوة التي نظمتها هيئة مغاربة العالم بتنسيق مع جمعية طيور الحياة يوم السبت الماضي 23/يوليوز/2016 بالمركب الثقافي الحي المحمدي.