•~♧ يا رجايا... ♧~• زجلية بقلم ابراهيم منتصر

يا رجايا...

فيك نترجا

عييت نكد ونجد
تشفاكي G ف وجه ناس
ؤ يامي كلها عوجه.

مال همومي كثرات
تعرمت ما بغات تتفاجا

لي قربت منو
ؤ نويتو حبيب
يهرب مني تقول غير خراجه

إيييه. ..
عليك أ يام لعز...!؟
النعجه والعوجه
ؤ لخير إل جا.

اصلوا ...
غير نصاص
ؤ ل كصاص G
ؤ ل تبدأ لعتابي.
إيييه عليك أ يام
لفرح ؤ لكمانجة.

كثر الهم ...
ؤ تعرم قرابص
ؤ لعديان طالبين فراجه.
يام لفرح بقات فيها غير قجه.

دازت يام لعز
في لمدينه ؤ ذاك الدوار.

وانا صغير نجري...
ؤ نلعب في الزنيكة G.
حابه ؤ غميضة...
والباقي كلوا تكوار.

زنيكةG كلها خبيزة
كارصة G ؤ بلعمان...
حصيدة مطلية نوار.

في لبحيرة...
الدلاح غير مدركش
ؤ لعباد من لفجر تهبش
دلاح سميتو ولات كوار.

يام فيها الداليا
بالغلة عركانه G تنهج
بالثقل ؤ لخير فروعها تترعد
تكول G ضربها بوفالج...
لخير غير مدفك G من دار لدار.

يام تلوح فيها الحبة
وترجا دمعت سحابة
من ربي العاطي لغفار.

من بعد ديك ليام ...
كلامنا تقج
هزوا لكفوف
ؤ قادوا صفوف
راه ربي رحيم ؤ ستار.

يام زينه ...
شعير ؤ فرينة
فول ؤ دريه ...
لحصيده كلها مط ؤ غمار

يام فيها شبعت لبهايم...
لفلاح...لفقيه...ؤ لمحضار.

* بقلم الشاعر الزجال : إبراهيم منتصر
* بتاريخ 18 يونيو 2016
* مدينة سلا المغرب