الله يْرْد البَاسْ
تبْوًقتْ فالرْويضَة بْواحْد السْبسِي
وبعشرين ...شقفْ
ومن عْمَرْ الرًاسْ قلتْ صَافِي
دبَا غدِي نهْضَرْ بْلا مَا نخافْ
ومنْ تكْرْكبْتْ على دارْ السْقفْ
وفْ السٌورْ دلحَدًادِينْ ..وقفنِي رَاسِي
مْنْ عْيَا به لكتافْ
وقال لي شوفْ .. شوفْ داك البناية
لِي عْليها شلا عْسُوسْ
تْمًا مْجمُوعِينْ... شْلا نفُوسْ
تمًا... تمًا نَايْضَة حَرْبْ البسُوسْ
تمًا مْضارْبينْ عل الوْزِيعَة عل الفلُوسْ
تمًا تبَخًرْ مَالْ الزْفتْ والقادُوسْ
تمْا تفرْقتْ فابُورْ أرْض الحْبُوسْ
تمًا أرْض السْبيطارْ الإفتِرَاضِي... تعْطاتْ للخَنفُوسْ
بْشِي مْلِيْنَاتْ ...وبْعَنًقْ.... وْبُوسْ
تمًا طبْخُو شْلا طوَاجْنْ ...هدا مَالحْ وهادا مْسٌوسْ
عَارْ الله شكونْ لِي فينا مْنحُوسْ
وبْغا يْبْلِينا بدْمْ العَترُوسْ
ويْخَلِينا عَايشِينْ ....وسْط الكفٌوسْ
والضًحِيًة ...هُو البلاد ..هو أنتَ وانَا
وداكْ ...الفْلٌٌوسْ ...لِي كْلاتُو سِيوَانَة
و داكْ المْسكِينْ لي وَاقفْ كل يُومْ حْدا المَكًانَة
مْخلِي وْلادُو فالدارعْرْيَانة..... جَيْعَانة
وتيْسَاينْ ...رْحَْمَة مَولانا
وداك لِي مَاتْ ولدُو فتِطوانْ ..وبْغَى يْحْمَقْ
وجَابُو مْسكِين مْن تمًا بْغسِيلْ الفنْدقْ
وداك لِي رَابْ عْلِيهْ السٌورْ
ومْشاتْ على عَيْنُو ضْبَابَة
لا دِيًة لا تعْويضْ لا تحْقِيقْ لا مُرَاقبَة
وسِيرْ وسِيرْ الله يْرُدْ البَاسْ
حْنا غَابَة ...وانتم حَطابَة
كو جْمْعُو غِيرْ فلوسْ الضًرَائِبْ لِي مْشتًة
يْبْنِيوْ بها ...... بُوهْلال وتَاشْتة
المُهم أنا غِيرْ مْبوًقْ مَا تدِيوْشْ عْلِيا
غيرْ وْكانْ بلادي وزان الحبيبة عْزيزَة عليا
ليست هناك تعليقات:
إرسال تعليق