هي بالصح... شلا و شلا ، ؤ اتقدري اتڭولي شلالات من شلات ، هو يمكن... الڭلب الكلب ادلى اركع مرة ڭولي مرات ، هي الڭدية... كانت غير بدية ، حلفات لا تتخلى زادت ڭدية على ڭدية ، وللات ڭديات ؤ بكات العيييييين ............ هي العين احرامية. وخا ابكات ... ما ساست دمعات ، و التبسيمة عليها طنزات بانت ضاحكة ؤ شلا و شلا ما غطات ، هي الشمس... اللي شمسنا مللي طلڭات خيوطها امسرسبة سوالف ؤ كل سالف ع لفجر طاح هايف و اطلع النهار ف اصباحو تالف اتعجج اضحاه ؤ ظهرو الخايف من عصرو المخنوڭ و الجايف.... ؤ ف امغربو زاغ و انحارف و اتخلط الشين مع الزييييييييين ................. انڭولو الخيب خاواه الزين ؤ غير هي ... مدرت ازمانا اتڭعدات دراتنا ... مللي ارياحنا اتحركات و النبغة .... نبغة منا سدات العين ديك للي كان إيغديها اجبل و كانت اشفا راها اليوم نشفات ما بقات ڭادة ... ل فمها اتحل و لا ڭادة... اتجود ب العفا ؤ انڭولو ما هو باس والو باس.... الناس ب الحرف و الحرف ب الناس و المسكون مسكييييييين ...... سير ع الله المسكون ليه الله و انكولو ما هو باش ياك ....! والو باس ياك...! ما طاح بيت ما اخسر اقياس ياك...! ألواه ألواه غير هو .... ذاك الهاتر د الوسواس ياك...! اركب مولاه من الراس تال الرجليييييييبن ............. داك الواعر.... الخاسر.... الكافر... د الوسواس اسرى ف اسواري سوس الساس ؤ هكاك ڭلنا ما هو باس والو باس.... غير انت كان خصك اتردي بالك... عاد تتصرفي كان خصك اتخرجي من اهبالك ... باش اتعرفي ب للي عمري ما كنت صمرة ، ف ليلة صر من ليالي حياني و لا كنت شي مرة ناوي نڭسيك ، كان خصك اتعرفي ... باللي أنا عمري ما كنت جمرة ، نزند ف الصمايم لهيب نيراني و لا كنت شي مرة ناوي نكويك ......... كان خصك اتوڭفي ... حتى اتشوفي ما بين احروفي و اتصفي .... عاد اتعرفي ب للي أنا ... ما كنت غير شجرة وسط ديك الغابة كنت باغي انشونك تحث ظلي ؤ من حر الشمس نحميك ، كان خصك اتوڭفي حتى اتشوفي ما بين احروفي و اتصفي عاد اتعرفي ب اللي انا... ما كنت غير ثمرة ، جابتها ديك الصابة كنت ساخي انتڭ ڭلبي و نرميه نتعصر من جوفي ؤ نسقيك ... و لا نشكي ...و لا نيييييييييين . كنت باغي نسقيك و اعليها اتحرفت ( مع تفخيم الراء ) احروف ليك كنت باغي نسقيك و اعليها اتحرفت ( مع ترقيق الراء ) ف الدي.... كنت باغي نرويك.... شلا و شلا ري ، سع انت اتصمكتي سع انت اتعميتي يمكن اتحميتي ... يمكن ضربك الشعا ، أو يمكن انتي ... اللي عمشتي عينيك اتجليتي... و احلات ليك الترعا ، و اغرقتي ف لبغو حتى ل وذنيك يمكن ابغو يمكن ابغا (ء) كان و اطغى كلشي ارغا ؤ تا حد ما بقى بغى يسمع و يصغى و لا حد .... باقي عارف راسو فييييين . كلشي اسخف و تا حد ... ما ابقى يعرف شيعان شعبات الخوف ايتلف.... اليوم فينا سكنو الآااه ؤ صوف.... و الغد غدنا منا اتنتف.... و ما ابقى .... ( تيت...تيت...تيت ) حاشا السامعييييييييين ........................... ااااه يا اندامة على هاد ابغوك ، يا اندامة و بلا املامة لو كان.... اسمعتي اصياحي ف ذاك اغروب الشمس و انت زاهية فرحانة.... فوڭ ذيك دفلة حب الملوك على جنب ديك الترعة الفايضة اغرام ، اااااه يا اندامة على ذاك ابغاك يا اندامة و بلا املامة لو كان.... اقريتي لواحي المنقوشة ب اظفار النفس اڭبل ما تمشي سايبة سكرانة..... و الفرحات ما ڭدوك اڭبل ما تفهمي .... ؤ ترواي الكلام و اڭبل ما تطغاي و اتديري جنحيييييييين ............ اڭبل ما طيري و ادوري ....ادوري و عليا أنا اثوري و اتولي ... من بعد اتڭولي ماهو باس ، كنت ؤ كنت إييه .... كنت ؤ كنت و احسن انڭولو كنا كنا انفيقو انهراتنا كنا انعسو ليلاتنا و كان ازمان و راح ... كنتي انت ...شمسو و ما كان ليك ارواح و كنت انا اڭمرتو نضوي من اعيونك لملاح كنت انت اهواه و نفسو عند اطلوع كل اصباح و كنت انا ديما نتنفسو ب ڭلب محلول مشراح كنت انت اقوافي عرسو مكتوبة ب احروف افصاح و كنت انا خرقة انلبسو مني غايرة اوراق و لواح ، و كان ازمان و راح ... أو ڭاع .. اللي ساحوا جاحوا طاحوا راحوا ؤ ما سابوا .... ما يتڭال ل التاليييييييييين . كان ازمان و راح و ها تعت الله .... باغي نرتاح هاااا تعت الله و ڭاع ملح اترابك المشروكة خليني هن ، جهدي اتهد تحت لڭدام منشار ما ڭادش انزيد .... دمي ارخاص مرشوش امداد عل الطريق . هااا وجه الله ... الروح باتت مملوكة العين ما تلات اتحن ، ساڭية عل الخد الڭلب واكلاه النار خليني ابعيد.... يمكن نهدا يديني انعاس نرڭد ارڭاد ؤ ما انفيق ، قلتها ... إيڭولو كان اطريد ! و عل الله... شي خطرة يتفكروني لولاد ايدوزوا ف يوم... على قبري و يتألموا ايوڭفوا على شاهدي ؤ يترحموا و يڭولوا ... اهنا راڭد داك المعناد هانا راڭد.... داك اللي كان يبغيك و كان ب دمو.... يكتب اسمك على كل تيلاد اهنا راڭد ... داك الوليد اهنا راڭد ... داك الشهيييييد أودي.... سير ع الله ما هو باس والو باس... ؤ كلشي زييييييييييين ..../ ( الحي المحمدي - المحمدية - الرماني - تاوريرت - أزمور - بنسليمان 2016 )
ليست هناك تعليقات:
إرسال تعليق