تسع شهور
و انا حاملة بيه
من شمس و ريح
حامياه بين حضاني
--
و نهار زاد
من فرحتي
بغيت نطير
نسيت ضراري
و نسيت محاني
--
وشحال بيه تعنيت
و قلت هو ركيزتي
و عوين
لدواير زماني
--
لمرض يجفاني النوم
و مطحونة الرحى
ما دوز بين سناني
--
وكلتو الغالي
و انا الرخيص
و لبستو الجديد
و انا البالي
--
و نهار ربى الريش
كَال لي سيري لهيه
تتحشميني بين كَراني
--
وخا كَال ما ديت عليه
اللي بين الضلوع
ما هناني
--
اليوم هو كبر
و انا بالشيب تغطيت
تنكر ليا
و ف الخيرية رماني
--
يا ولدي
هدا غير دين
سلفتو ليك
غدا يردوه
أولادك بالمثاني
--
يا ولدي البزولة
مازال مغرزات
خايفة نهار تندم
ما ينطق لساني
-------------------------فاطمة المسعودي
ليست هناك تعليقات:
إرسال تعليق