" يا زَايَرْ بلادي " بقلم فاطمة المسعودي

يا زَايَرْ بلادي
دْخل و سَلٌم
ما كَاينْ
مْنَاْش تْخافْ
--
بلادي بْلاد الْجُودْ
و الْكَرمْ
بْلادْ الصالحين
و لَشْرَافْ
--
ضَيْفْ الله لقْصدنا
نهزوه
بَرْموش العين
و نْحَطوه
عَ لَكتافْ
--
يا زَايَرْ بْلادي
وخا تَمْشي
رَاك تْوَلي
بْلَادي ...ولافْ
--
ف بْلادي
فَنْ و صَنْعَة
زُور جَامَعْ لَفْنَا
تْمَتعْ بَفْنُونْ
مَنْ كُلْ اصْنَافْ.
--
بْلًادي تَبْهَرْ
الْبَرْ مْعَانَقْ لَبْحَرْ
وْ لَمْدُونْ مْعَانْقة لرْيَافَ
--
وْلَجْبالْ لابْسَة
مَن الثلْج
سلهام بيض
كِيفْ الْعْرِيس
لِيلَة الزْفَافْ
--
الزينْ فَ بْلَادِي
مَوْهُوْب
سَرو رَبانِي
سَولْ مَنْ زَارْ
وْ شَافْ
--
زُورْ الاطْلَسْ
تْشُوفْ الجلابَة
من الصوفْ الْحُرْ
و خنجر بَحْمَالَة
حْرِيرْ عَ لَكْتَافْ
--
وْ فَ الشمَالْ
السبْنِية بالمُوزُونْ
و الْمَنْدِيلْ
بَلْوَانْ زَاهْيَة
عَ لَرْدَافْ
--
فَ الجَنُوبْ
بْلَاد الْقَصْبَاتْ
وْ لَخْيَامْ
تْشُوفْ الشبان
وْ لَرْيَامْ
بالدراعية
وَ الْحَافْ

--
بلادي
شرق و غرب
شمال و جنوب
صَايَنْهَا مَنْ بَعْد الله
مَلِيكْنَا الْمَحْبُوبْ
يَارَبي تحميه
و تَحْمِيها
رَا حُسادْنا بزافْ
-------------------- فاطمة المسعودي