اتقدري...
اتڭولي عليا شين ،
و يمكن تڭولي عليا زين
أو تجيبها ف الوسط
و تڭولي بين و بين .
اتڭولي عليا شين ،
و يمكن تڭولي عليا زين
أو تجيبها ف الوسط
و تڭولي بين و بين .
اتقدري...
اتڭولي قاسح ما انلين ،
و يمكن تڭولي عليا حنين
أو تجيبيها ف الوسط
و تڭولي بين و بين .
اتڭولي قاسح ما انلين ،
و يمكن تڭولي عليا حنين
أو تجيبيها ف الوسط
و تڭولي بين و بين .
اتقدري...
تڭولي عليا اهبيل ،
و يمكن تڭولي هذا ارزين
أو تجيبيها ف الوسط
و تڭولي بين و بين .
تڭولي عليا اهبيل ،
و يمكن تڭولي هذا ارزين
أو تجيبيها ف الوسط
و تڭولي بين و بين .
أنا يا لالة ،
ما هادي و لا هادي
ولا ديك ...
انا صورة رسماتها عينيك .
ما هادي و لا هادي
ولا ديك ...
انا صورة رسماتها عينيك .
أنا يا لالة ،
ما هادي و لا هادي
ولا ديك ...
انا ليا كبدة عجناتها يديك .
ما هادي و لا هادي
ولا ديك ...
انا ليا كبدة عجناتها يديك .
اتقدري...
تڭولي عليا " زير "
و عينيا زايغة...
غززال و حرفتي فن لكلام ،
يمكن تڭولي بالصح
اعشق و ابغا...
اتحكم فيه زين للات لريام ،
أو تجيبها ف الوسط
او تڭولي :
" لساني انا مولات لقلام
خلاه يبرد ...
يستانس و يسخن يرغا
ويولي عشاق
ما كاينش اعلاش يتلام " .
تڭولي عليا " زير "
و عينيا زايغة...
غززال و حرفتي فن لكلام ،
يمكن تڭولي بالصح
اعشق و ابغا...
اتحكم فيه زين للات لريام ،
أو تجيبها ف الوسط
او تڭولي :
" لساني انا مولات لقلام
خلاه يبرد ...
يستانس و يسخن يرغا
ويولي عشاق
ما كاينش اعلاش يتلام " .
أنا يا لالة ،
ما هادي و لا هادي
ولا ديك ...
أنا إنسان ...إييه إنسان
ماني ملاك ماني شيطان
أنا بشر ...إييه بشر
ماني رغوة ماني احجر
كنشوف كنزعم
و فيا الخوف ،
شفت اتريا ...
اعشقت بالنية ،
و فيا شدات نار لغرام .
ما هادي و لا هادي
ولا ديك ...
أنا إنسان ...إييه إنسان
ماني ملاك ماني شيطان
أنا بشر ...إييه بشر
ماني رغوة ماني احجر
كنشوف كنزعم
و فيا الخوف ،
شفت اتريا ...
اعشقت بالنية ،
و فيا شدات نار لغرام .
أنا واحد من الخلق ،
نمشي ف السواق
ناكل القوت ...
كيما يڭولو ،
و نتسنى الموت ،
مرة ب عقلي...
و مرات مع الحماق
نبرول و انڭول
و شي يڭول نظام
شي يڭول زجال .
نمشي ف السواق
ناكل القوت ...
كيما يڭولو ،
و نتسنى الموت ،
مرة ب عقلي...
و مرات مع الحماق
نبرول و انڭول
و شي يڭول نظام
شي يڭول زجال .
أنا يا لالة ،
ما هادي و لا هادي
ولا ديك ...
انا حالي بحال ڭاع الرجال
نقبل لي اعليا...
و ما نسامح ف حق ،
انراعي ل المروة او لخلاق
نمشي مع الوقت ،
انطاطي ل عواصف الخريف
ما نتلفت ولا نندم
على طيوح اوراقي من اعواده ،
نجري حفيان تحث اخيوط الشتا (ء)
نلعب ب كبات الثلج
نفرح و نمرح ب ابياضه ،
انغني مع افريخات الربيع
انجول نسقي عينيا ب لوانه
نزها نقطف اوراده ،
نسعد ب صابة و خير الصيف
نتمتع بالبحر و شطآنه
مللي اتراريني أمواجه ف ترداده .
ما هادي و لا هادي
ولا ديك ...
انا حالي بحال ڭاع الرجال
نقبل لي اعليا...
و ما نسامح ف حق ،
انراعي ل المروة او لخلاق
نمشي مع الوقت ،
انطاطي ل عواصف الخريف
ما نتلفت ولا نندم
على طيوح اوراقي من اعواده ،
نجري حفيان تحث اخيوط الشتا (ء)
نلعب ب كبات الثلج
نفرح و نمرح ب ابياضه ،
انغني مع افريخات الربيع
انجول نسقي عينيا ب لوانه
نزها نقطف اوراده ،
نسعد ب صابة و خير الصيف
نتمتع بالبحر و شطآنه
مللي اتراريني أمواجه ف ترداده .
ليست هناك تعليقات:
إرسال تعليق