زجلية من وحي الصورة *** صرطني التخمام *** بقلم مجنونة الحرف والركح: فاطمة بصور.

ملي مشات...
ؤوجات...
بيا ديك ليام...
اتعكل السهو
فجلايل التخمام
وسافر بيا ...
ف خيال لعمر
الگيتني مودرة فيا
فيا وانقلب عليا؟!
انقلب عليا ...
فزمان الصغر
اللي بلا هواه
زرب عليه داك لعمر
طليت عليا مني
ف بحر الصبر
اللي مواجو فالتگلاب
گد مواج لبحر
ولى گاع اكتر؟!
الگيتني...
مودرة فيا...
ولسان حالي يگول
واش بصح أنتي هيا؟!
هي ديال داك البارح
يا ديك انتيا؟!؟!
مال الوردة دبلات؟!
مال الصورة كشفات؟!
مال سوايع الوقت
عليك زربات؟!
وداك البارح...
دغيا انقص گلبو فالدقات؟!
عدريني...
يا مراية الوقت المگعورة
يلا اليوم...
اوگفت گدامك بهد الصورة؟!
كون عليا جات؟!!
كون ما انطل عليا مني
فيك انتيا بالذات !!!
وانرد اللور...
اللور...اللور... بالتخمام
عمر دوك الخطوات.

مجنونة الحرف والركح: فاطمة بصور.