" شكون كال "زجلية ساخرة : بقلم حكيم البورشدي

شْكُونْ گَالْ

شْكُونْ گَالْ
المَغْرِبْ شُطْآنْ وَ بْحُورْ !
وَ تْنَاسَى السَّدْ وَالجْبَالْ
وَ صْرَطْ لْسَانُو فِالثْخُومْ
يَاكْ طَنْجَة
عَانْگَتْ الصَّحْرَا
وَ تْلَاگاتْ بِالمْحَبَّة الگْلُوبْ
فطَرْفَايَة و بُوجْدُورْ

شْكُونْ گَالْ
المَغْرِبْ بْوَابُو زُوجْ بْحُورْ
وَ لَّا حْدُودُو زُوجْ بْغَالْ
يَاكْ دْرَاعْنَا مَنْ البُوغَازْ
وْصَلْ العْيُونْ ،،
بِالمَسِيرَة حَرَّرْنَا العَرْگُوبْ
وَ طْرِيقْ الگْوِيرَة
تْوَسْطَتْهَا بْلَادْ الرْحَامْنَة
و الصْخُورْ

شْكُونْ گَالْ
البَرْمَة تْفُورْ
وَ البَنَّة تْكُونْ
بْلَا گَرْعَة
وَ اللَّفٍتْ المَحْفُورْ
وَ لَّا الگَلْبْ
يْفَرَّقْ فِي المْحَبَّة
وَ يْفَوَّتْ بِينْ الخُوتْ
يْهَابْ المُوجْ
وَ يْسَاوِي
بِينْ بُومَة وَ صْقُورْ

شْكُونْ گَالْ
المُلْك يْعِيشْ
غِيرْ فِالقصُورْ
يَاكْ التَّارِيخْ اثْبَتْ
وَ الصَّحْرَا بِالبَيْعَة
نَصْبَتْ خْيَامْهَا
للمَنْصُورْ

شْكُونْ گَالْ
العَدَلْ مَاتْ
وَ تَّنْعَى مَنْ زْمَانْ
وَ لَّا الحَقْ ذْبَالْ
فْعَهْدْ السُّلْطَانْ
يَاكْ المَسْكِينْ
عْلَامُو تْهَزْ
وَ ضْوَاتْ
طْرِيقُو بِالعَزْ
وَ رَجْعَتْ الكَلْمَة
تْرَفْرَفْ
حُرَّة حَقْ
مَنْ حْقُوقْ الإِنْسَانْ

شْكُونْ گَالْ
دْرَاعْنَا قْصِيرْ
وَ العْمَى عَنْدْ الضْرِيرْ
يَفْتِي فِالقْطْرَة
وْ سَقْفُو قَصْدِيرْ
ياكْ القْبَايْلْ
خَرْجَتْ ثَايْرَة
تْطَالَبْ بْحَقْ المَصِيرْ

شْكُونْ گَالْ
اللَّحْيَة فْيُومْ تَحْكَمْ
وَ تْغَيَّرْ كِيفْ الحَيَّة
الجَلْدْ ،،
وَ تْلُوحْ القْشُورْ
وَ لَّا البْخِيلْ
يٍْمَدْ بِالخِيرْ قْرَابُو
وَ يْخَرَّجْ مَنْ مَالُو
حَقْ العْشُورْ

شْكُونْ گَالْ
طَنْجَة
تْعِيشْ فِي الظَّلْمَة
وَ لَّا مُرَّاكَشْ
تَشْعَلْ شْمُوعْ
تْعِيشْ لِيلْهَا دَامَسْ
وْ تَصْرَخْ
فِوْجَهْ الزَّرْزُورْ
يَاكْ احْنَا بَعْنَا
وَ قْطَعْنَا الشَّجْرَة
مَنْ الجْذُورْ
تْلَفْنَا وْ تَلْفَتْ بِينَا
رْضِينَا بِالدَّلْ
وْ عْفَطْنَا عَالقْشُور

شْكُونْ گَالْ
الزْرَعْ المَطْمُورْ يْبُورْ
يْنَدِّي
وْ مَا يَخْرُجْ عْشُورْ
يَتَّفْسَخْ وَ يْدِيرْ جْذُورْ
يَاكْ السَّرْ فِالخْزَايْنْ
وَ الغَّلَّة
مَا تْصُونْهَا صْرُورْ

شْكُونْ گَالْ
الزْمَانْ يْدُورْ
وَ قْرَايْةْ الطَّالَبْ
تْصَدِّي وَ دِّيرْ قْشُورْ
يَاكْ العَلْمْ يْنَوَّرْ
وَ يَتَّنْقَشْ مَنْ الصْغُرْ
فِالعْقُولْ
يْفَتَّحْ كِيفْ الزْهَرْ
وْ مَا تْحَجْبُو سْطُورْ

شْكُونْ گَالْ
المْوَازَنْ بْلَا صْرُوفْ
تْگَادْ الحْقُوقْ
يَاكْ نْعَسْ الفَارُوقْ
تَحْتْ الشَّجْرَة
وَ مَا قَرْبَاتُو شْرُورْ

شْكُونْ گَالْ
القَطْرَة مَنْ المْطَرْ
مَاشِي مَنْ ثْقِيبْ القَرْمُودْ
شْحَالْ مَنْ خْبِيثْ
مَيَّلْ الوَزْنَة بِالغْدَرْ
وَ غْطَسْ رَجْلُو فِالوْحَلْ
دَخَّلْ رَاسُو فِالزْرِيبَة
وْ تَمَّا حْصَلْ

شْكُونْ گَالْ
الزِّينْ فِالشْعُورْ
دَّاهْ الفْحَلْ فِالمْهُورْ
لُو كَانْ
الخِيرْ فِالشْعَرْ
مَا كَانْ الخِيلْ
سْوَالَفْهَا اللُّورْ

شْكُونْ گَالْ
العْرَقْ يَتْبَاعْ عْطُورْ
وَ العَامَلْ تْوَفَّى حَقُّو
وْ عَاشْ مَسْتُورْ
لُو كَانْ تْمُوتْ الحُگْرَة
كُونْ تَقْرَى هَمُّو
مَا يْمَصُّو دَمُّو
وَ لَّا يْمُوتْ
وْ حَقُّو مَهْضُورْ

شْكُونْ گَالْ
العْمَى فِالنْظَرْ
وَ ظْلَامْ البْصَرْ
مَاشِي فْقَلَّةْ الصْبَرْ
يَاكْ گَالُو
الجَهْلْ يَعْمِي لَبْصَارْ
بِالطْمَعْ
وَ بْعَرِّي الفْقِيهْ
مَنْ الوْرَعْ
يْمَيَّلْ القَلْبْ مَنْ الصْدَرْ
يَنْتَشْ الرِّيشْ وَ يَدِّي الوْبَرْ

شْكُونْ گالْ
المْرِيضْ يَدَّاوَى بِالسْبُوبْ
وَ يَلْگَا رَاحْتُو فِالعْشُوبْ
يَاكْ لْهَاوْهْ بِالوَعْدْ وَ الكْذُوبْ
مَنْ ضَرُّو غَزْلُو صُوفَة وَ كْبُوبْ
وْ مَنْ عَلْتُو رْمَاوْ ضَالَة
شَيْدُو القْبُوبْ
دْخَلْ بْعَلَّة خَرْجُوهْ يَزْعَلْ
وْ مَنْ وَعْدُو يْصَرَّفْ المَكْتُوبْ

شْكُونْ گَالْ
هَذَا حَالِي وْ رَاضِي بِيهْ
وَ لَّا نَاسِي خُويَا وْ سَاخِي بِيهْ
يَاكْ عْدَرْنَا جَهْلُو
وْ گَلْنَا الدَّنْيَا دَايْرَة بِيهْ
عَجْبُو الدْفَا
وْ طَوَّلْ عْلِينَا رَجْلِيهْ
دَرْنَاهْ طْبَلْ وَ شْطَحْنَا بِيهْ ،

2-2

هَذَا زْمَانْ گَالُو
مَا خَلَّاوْ حَدْ فْحَالُو
كُلْهَا يَلْغِي بِقْوَالُو
يَفْتِي وَ يْگُولْ گَالُو

هَذَا زْمَانْ گَالُو
مَا خَلَّاوْ حَدْ فْحَالُو
يَغْرِي خُوهْ بِالطْمَعْ
وَ يَدِّي لُو رَاسْ مَالُو
گُدَّامْ النَّاسْ يَدْمَعْ
وَ يْگُولْ مَسْكِينْ مَالُو

هَذَا زْمَانْ گَالُو
مَا خَلَّاوْ حَدْ فْحَالُو
كُلْهَا يَلْغِي بِقْوَالُو
يَفْتِي وَ يْگُولْ گَالُو

يْمَدْ رَجْلِيهْ بِالغْدَرْ
فْأَرْضْ غِيرُو وَ رْمَالُو
وَ نْسَى وَقْتْ الخْطَرْ
مَنْ غِيرْ جَارُو ،، !
شْكُونْ كَانْ
جَنْبُو وْ عَالُو ،، ؟

هَذَا زْمَانْ گَالُو
مَا خَلَّاوْ حَدْ فْحَالُو
كُلْهَا يَلْغِي بِقْوَالُو
يَفْتِي وَ يْگُولْ گَالُو

تْلَاهِينَا بِالمْحَبَّة
دَاوِينَا هْبَالُو
ضَاقَتْ القْبَايْلْ
بْشَرُّو
وْ ثَارَتْ عْلَى فْعَالُو

هَذَا زْمَانْ گَالُو
مَا خَلَّاوْ حَدْ فْحَالُو
كُلْهَا يَلْغِي بِقْوَالُو
يَفْتِي وَ يْگُولْ گَالُو

مَا دَارْ الخِيرْ فِعْيَالُو
وَ عْلِينَا يْطَوَّلْ لْسَانُو
خَبَّا رَاسُو فِالضْرَگْ
حْتَى قَرْصُو خْيَالُو

هَذَا زْمَانْ گَالُو
مَا خَلَّاوْ حَدْ فْحَالُو
كُلْهَا يَلْغِي بِقْوَالُو
يَفْتِي وَ يْگُولْ گَالُو

كَشَّرْ نَابُو بِالغْدَرْ
وَ تْسَدَّاتْ عْلِيهْ قْفَالُو
دَارْ رَاسُو فِالرْمَلْ
وَ عْفْطَاتْ عْلِيهْ جْمَالُو

هَذَا زْمَانْ گَالُو
مَا خَلَّاوْ حَدْ فْحَالُو
كُلْهَا يَلْغِي بِقْوَالُو
يَفْتِي وَ يْگُولْ گَالُو

زجلية ساخرة : بقلم حكيم البورشدي