فْ حُب بلادي
ما يلومني لاَيَمْ
حبها حْقِيقي
ما هو بَكْلام الزُّور
--
حبها ما هو بيديَّا
هو من ربِّي
موشوم بين عينيَّا
و فْ قلبي مَحْفور
--
لَجْفَاتني القْوافي
و ما قْدرت
نوصَفْ لَمخبِّي
نشرو كلام مَنْثور
--
نْمُوت و تحيا بلادي
و لمسها ريحْ الشَّر
من لقبر ... نثور
--
اللي ذاق
عشق لبلاد بحالي
وشاف حالي يعذرني
و اللي ما جرب
راهو مَعْذورْ
--
ف حبك يا بلادي
راني هايم
و شكون اللِّي
ما يعشق حوريَّة
بين جوج بْحور
--
فوق راسها تاج
من نخل الصَّحرا
و في يديها ...
قصبات و قصور
**
يا السٌايل
على عشق البلاد
كيف يكون؟؟
جوابي ليك
ما يبرد الجُّوف
--
لو تْكون قطرة دم
نلوحك ف عروقي
و تدخل لقلبي و تشوف
--
تلق حب البلاد
مكتوب بالدَّم
ما يتَّمسح ما يذبال
كيف الحنة ف كفوف
--
كون تْكون مداد
و توصل لفكاري
تجبدهم ...
و تنشرهم حروف
--
تلقى القصيدة بْنَات
لحب بلادي محراب
و حروفي تلبي و الطوف
**
حب بلادي
ميشي غير كلام
نخرجو من فمي
--
حب بلادي
ميشي غير وهام
راه سْرَى فْ عروقي
و سْرح ف دمي
--
فْ حب بلادي ما نتلام
و اللي يلومني ...
يلومني ....
حتى ف حب بَّا و مِّي
----------------------------فاطمة المسعودي
بمناسبة ذكرى المسيرة الخضراء
ليست هناك تعليقات:
إرسال تعليق