-----------------------
اللِّي ضْحكْ لك ضحك لُو
و زيدو فوڭ الضحكة
تبسيمة
--
اللي كرهك ما يسد
ف وجهك الباب
و اللي يبغيك
ما برحب بيك ديمة
--
جُول تعرف معادن الناس
كاين الرخيس
و كاين اللي عندو قيمة
--
كاين اللي يْوَاتيهْ يسو ڭ
و كاين اللي خصو يتڭاد
مخلوق للصريمة
--
ف مجمع لكلام
فمك دير لو لجام
و قبل ما تهدر خمم
ماية تخميمة و تخميمة
--
و لا ديتي و جبتي ف الهدرة
لا تسرسب لكلام
دير ما بين الكلمة و الكلمة
تبريمة
--
تمعن ف الدنيا
تلقى حالها غريب
شي ف الميزيرية يعوم
و شي معاه كريمة
--
شحال من مشحاح
عليه الخير طافح
واحد كريم
حالتو عديمة
--
و شحال من واحد
يشكي بالعڭر
و شحال من صبيان
عايشة يتيمة
--
واحد يضل ناعس
و يتسنى الزهر يجيه
وْ واحد ما همو ليل
وْصَل لَسْما
و خْدا منها نْجيمة
--
واحد فادْ راسو و فادْ الناس
بنى حياتو من الساس
و دار ليها قيمة
--
و واحد ما على مريضو باس
ديمة الدنيا عندو لباس
ياكل و يرقد كي لبهيمة
--
على مالك كون عساس
و لا ترخيه ف يد فراس
يقول هدي غنيمة
--
هدي وصية
ف الدنيا لا دير لمان
ڭالوها جدودنا
من عهود قديمة
-----------------------فاطمة المسعودي
ليست هناك تعليقات:
إرسال تعليق