حلمت وانا فايقة
موسْدة راسي براسي
سمعت تخرشيشة...ذبانة
تتزغنن في ودنيّا
تتدقْ عْليّا...نوضي
لقيت حْروفي مْكبّْلة
مسجونة بسلاسل الوقْتْ
بين البير والمطْفِيّة
بين السلكْ والزّرْبْ
وسْدْرةْ القلبْ
مدْفونة فْ اخْيالي
امْكفنَه فْ اخْبال أيّامي
اشمّْني وسواسي
قالي غير فْ اسْكاتي نعسي
فْ سبعْ اسْماوت رماني
هدْهدْني...فْدْفدْني
لمْلمْني فْ منديل احْريرْ
على سجّادتْ لِقْدرْ
منْ اسناسلوماقدّيتْ انْتحلِّ
العيشة احْكاياتْ ..اسْرايْرْ
وحجاياتْ شمسْ وْ ضلْ
الشمعة شاعلة وانت تسوّلْ
اعلاش النهار مابغى يطلعْ
علاش اصبحْ مكحّلْ بلفحم
اوْلاّ عيْنيّ حشْمتْ للزينْ تنْظرْ
خاطري حتّى فْ الحلم اتقهرْ
اعْطاتْني بالضْهرْ
نبكي ووحدي نْهضرْ
ياكْ كل دا ليهْ ادْوا
الجرْحْ يْبْرايْلا اتْكْوا
القلبْ المشقوقْ بسيفْ العْمرْ
بْ خيْطْ الخرّازْما يْتْجْبرْ
الزجالة فوزة الفاسية
في 03يونيو 2016
ليست هناك تعليقات:
إرسال تعليق