•~♧ لالة هدى ♧~• بقلم * الشاعر الزجال : إبراهيم منتصر

تمنيتك صورة بين عياني

حني ؤ رحمي
لالة هدى حبك شواني 
خرج لكلام لمرصع من لساني
قلت يا قلبي...
واش غرامها وتاني

قولوا لالة مولات الخمار
راكي في قلبي ؤ عمارت الدار
حبك يقطع في وصالي بحال المنشار
ربي وحدو لي عالم لصرار
يا محبوبي جيت دليل طالب لشوار
قلبي عليك ملهوف يفيض مرار
لهبني ذاك الزين المسرار
دموعي عليه طايحة بحال لشرار
ؤ ما قدرتي يا قدار

لالة هدى زينت لمحزم
القد ؤ لبها ...
ؤ روايح من بعيد تشم
علاش قلبك عليا ينقم
راني عبد بين ايديك سلم
بجاه النبي نتمنا نغنم
بهواك ؤ مال ؤ جاه ما يتم
بجاه لالة هدى...

لالة هدى زينت لحريم
هواك يكلع G الضيم
تمنيت نكون ليك حريم
غرامك ما يفوز بيه...
غير زعيم.
ؤ لا مرضي الوالدين كريم

لالة هدى بقدها م حلاه
زادها نويف منكاد G في بهاه
ؤ لحموره في شفاه
ؤ لخدود وراده

لخدود وراده
خلاوني لا سباده
و لا عباده
في هواها بالعادة
نجيب ليها في الخروف الصراده
ؤ من لبكري G لبلاده
هذا جهاز لالة هدى...

في فكورها ...
نهديها طلاعه د. صم
ؤ دويا ديال لكحل ...
مرودها من لعظم.
نجمع اللامه باش نختم.
هادي هديه لمحبوبي...
لالة هدى...

* الشاعر الزجال : إبراهيم منتصر
* بتاريخ : 05 يونيو 2016
* مدينة سلا المغرب