يا الداوي خاوي...! / زجلية بقلم Abdou Sultane Gassmy

يا الداوي خاوي...!
كاين أنا وهاداك
ولاخر جاي كيتصاخر
كاينين هوما وحنا
كلنا تجمعنا فالمحنة 
ويا ويلك منا يلا تلاقينا !

اللولى دازت سالمة مسلمة
الثانية دازت سالمة مكلمة
والثالثة شريعة الله
والله يحضر السلامة
من شي غمامة

ظلمتيها علينا
ودفينا اميها لظلامك
اجبرناه راگد يشخر
فيقناه يصلي الفجر
لقيناه عاصي بالحق اكفر
حلف هو لا يفيق !

را الذات عيات
والعين حمرات
والجنوية...
ترشگااات فالظهر !

إلا شفتي الصعرة صعرات
اعرف باللي اكثر عليها الضر
جمعت فخاطرها نخصات
هزت...
من ضرها...
من حرها...
من ثقلها...
وتقادى ليها الصبر

داير فيها بو العريف
وانت شي ما تعرف !
تزيد الزيادة كيف بغيتي
تخيط وتفصل
ولباسنا تكرف !
البصلة ولات
تسوى ريحتي
جوعتي...
قهرتي...
ما حسيتي...
رونتيها...
غلبتي..
ما بغيتي تعف !

درتي...
ميسة
ف-سمط ؤلمط
خليتي...
كلشي مكحط
وعييتي..
ما تزمط
بكينا على حالنا
ودموعنا
ما نشفوها شراوط !

خمس-سنين
فاتت من عمرنا...
دازت احلگ-ادلگ
وصبرنا !
ما شعلتي...
فيها شميعة
ولا قنديل
يضوي طريقنا
ما غرستي...
فيها نخلة
اناكلو من ثمارها
ولو ثميرة...
نفرقو بيها صيامنا !

وخمسوااات هوما !
ما فقنا...
ما عقنا...
واللي جانا...
منكم يضرنا...
يكذب علينا...
يشمتنا...
يقهرنا...
بغيناكم...
تخدمو بعشق
لقينا كلشي اتسرق
را العظم اتشق...
الجوف اتخنق...
والعقل اتخربق...
واك-واااك أ-الحق
فين هو الحق !؟
وإمتى شمسنا تشرق ؟
رجانا فيك يا ربي مولانا...!

حلمت ببلادنا الزينة !
غادة وتزيان...
ما فيها مخصوص
ما فيها جيعان...
ما فيها مقهور
ما فيها عريان...
ما فيها اباك صاحبي
ما يسدو علينا بيبان...

ما فيها ادهن السير-ايسير
ما فيها هذا كبير ولا صغير
ما فيها هم كثير
كلشي عايش بخير
كلشي ناشط
كلشي فرحان...!!!

من قصيدة *حسبونا خاوة*