تْعَلّمت وَ حْفظْت الدّرس / زجلية بقلم فاطمة المسعودي

-------------------------------------

غَرْسو فِيّا والِدِيّا
شَلّا غَرْس
نْهَار عْلَى نْهار
يْطِيبْ جْنَاني
و تَثْمَر غْرَاسُو
--
زَادْ عَلّمني الزْمان
و حْفظْت الدّرس
اللّي بْغَا السْلَامة
يْدِيرها الرّاسُو
--
تْعَلّمت ، لَحْيا
يْبان من اللّبْس
و خُبْز الحَادڭَة
يْبَان مَن تَڭْراسُو
--
عْرَفْت ، الدّنْيا
ما تْسَاوي فَلْس
و اللّي يْغَلّيوْهَا
ڭَدّامْهَا يَرْخَاسُو
--
تْعَلّمت كَثْرة الْهَدرة
تْجِيب النَّحْسْ
و لا تْبَرْوَلْ لَكْلام
را لَكْلَامْ بَقْيَاسُو
--
تْعلّمت لَزْرَعت الشُّوك
نَفَكَّر نْهَارْ نَدْرَسْ
الله يْنَجِّيني و يْنَجِّيكُم
مَنْ الشُّوكْ وَ دْرَاسُو
--
تْعَلّمت مَا نْكَثّر لْحَلم
مَلّلي نَنْعَسْ
اللّي بَغَا يَوْصَلْ
خَصُّو يْفَيَّقْ نْعَاسُو
--
عَلْمُوني كْلَامْ الْحَقْ
مَا يَتْخَبَّى مَا يَدَّسْ
الْحُر يڭَول كَلْمة الْحَقْ
و خَّا تْكُونْ بقَطِيعْ رَاسُو
--
تْعلّمت نواجه الزمان
و انا هازة هَرَاوة وَ مْقَصْ
وَ مْنِينْ مَا خْرَجْ لِيّا
نَقْطَعْ لَو رَاسُو
------------------ فاطمة المسعودي