يا دنيا يا غرارة مال احوالك بدالة؟
افعالك مشرارة وبصيفتك غي امرة هجالة!
اللي عاشرك يفضل يبقى فرادي وحيد...
افعالك مشرارة وبصيفتك غي امرة هجالة!
اللي عاشرك يفضل يبقى فرادي وحيد...
شحال ضحكتي ولعبتي بالرجالة!
ولعبك يا الطايشة فات قياس لبسالة
أتي گولي يآااه..! مال راسك قاصح وعنيد...؟
ولعبك يا الطايشة فات قياس لبسالة
أتي گولي يآااه..! مال راسك قاصح وعنيد...؟
بدلتي الضحكة بالندامة وشرك ما بغى يتسالى!
شلا ناس عل-الميمون بقات عوالة!
بسعدها القليل وكلتيها جغديد...!
شلا ناس عل-الميمون بقات عوالة!
بسعدها القليل وكلتيها جغديد...!
شبان ف-ربيع العمر مغربة جوالة
ل-كواغط مكمشة عاشقة ملالة!
لحيمات فتية دون ايقامة صارت گديد...!
ل-كواغط مكمشة عاشقة ملالة!
لحيمات فتية دون ايقامة صارت گديد...!
السارح دارح عينو زايغة زروالة
ثاق ف-الثعلب الگارح خلاه يرعى الحوالة!
كملها وجملها ف-التبن اشعل وگيد...!
ثاق ف-الثعلب الگارح خلاه يرعى الحوالة!
كملها وجملها ف-التبن اشعل وگيد...!
كيدرتي يا الصوطة واش من والى يتوالى!؟
انتي هاكدا خليقة ولا جيتي سلالة؟
رجعتي السلطااان يسعى العبيد...!
انتي هاكدا خليقة ولا جيتي سلالة؟
رجعتي السلطااان يسعى العبيد...!
آش بيك يا الگوطة راكبة بغلة ركالة؟
عطيتينا بالظهر وشدتيها طوالة!
جريتينا وراك مرمدتينا تمرميد...!
عطيتينا بالظهر وشدتيها طوالة!
جريتينا وراك مرمدتينا تمرميد...!
أيا امرة حارة حاكمة دوار البوهالة
گالعة غرس البسمة ب-البالة!
وهكاك ماكفاك هاد المرض زدتينا تماريض...!؟
گالعة غرس البسمة ب-البالة!
وهكاك ماكفاك هاد المرض زدتينا تماريض...!؟
تباني زينة بحجبان هلال وعيون مكحلة قتالة!
ها نبيعت الجارية عليه وتگولي ليه تعالى!
ف-طرگان وديان زفتها گطران والحال مزال بعيد...!
ها نبيعت الجارية عليه وتگولي ليه تعالى!
ف-طرگان وديان زفتها گطران والحال مزال بعيد...!
نصحابك ثقيلة ورزينة اطلعتي برطالة!
ضاحكة فوجه ذياب مخرجة نياب وكالة!
والدرويش ب-الهم اتگهم ذوق اسعيد وزاد اليزيد...!
ضاحكة فوجه ذياب مخرجة نياب وكالة!
والدرويش ب-الهم اتگهم ذوق اسعيد وزاد اليزيد...!
زين العزبة فالمفصل وخميرتو فالثقالة
يلا كمل بالأصل هاديك مولاتي بنت لالة!
ماهياش دار الصابون تصبن بلا ترقيد...
يلا كمل بالأصل هاديك مولاتي بنت لالة!
ماهياش دار الصابون تصبن بلا ترقيد...
لغراز فكو الولادة وخالفو شهور لحمالة!
أناري ميمتي السلامة واش هاد الحالة!
يعلم الله بالوقت الماجي كيف يكون نهار العيد...!؟
أناري ميمتي السلامة واش هاد الحالة!
يعلم الله بالوقت الماجي كيف يكون نهار العيد...!؟
كدى هيا جردة تهملات ورجعات نوالة!
فيها طلع الفريخ ريشاتو وقت البدالة!
طار وعلا بالفرحة غنى موالو تغريد...!
فيها طلع الفريخ ريشاتو وقت البدالة!
طار وعلا بالفرحة غنى موالو تغريد...!
فلوس المصران تسبيح ف-يد العمالة!
والضبابة على العين دارت جلالة!
عاد الحلال يتسفال مل-الحرام والفقيه يدي التقليد...!
والضبابة على العين دارت جلالة!
عاد الحلال يتسفال مل-الحرام والفقيه يدي التقليد...!
بعتي وشريتي باش بغيتي فسوق الدلالة!
المليح ارجع شياطة حاسلة باسلة!
والفورص ولات گيمتو گيمة السميد...!
المليح ارجع شياطة حاسلة باسلة!
والفورص ولات گيمتو گيمة السميد...!
غاب المصروف تكفنت الحروف ب-كفوف الحمالة
وگعبوب الجمل معروف راگد ف-جوف الجمالة!
لا سماحة ل-اللي كانوا سباب خلاو حالها غريب ؤفريد...!
وگعبوب الجمل معروف راگد ف-جوف الجمالة!
لا سماحة ل-اللي كانوا سباب خلاو حالها غريب ؤفريد...!
أخايت عليك يا دنيا مالك منوظة قربالة!؟
قوة المطارق فالراس مضرگاها غوفالة
بهاتت بالشيب وكثرة الدق تعوج الحديد...!
قوة المطارق فالراس مضرگاها غوفالة
بهاتت بالشيب وكثرة الدق تعوج الحديد...!
تعطي وتمني من عوايدك بروالة
الهربانة عليه مكمد ناقصاه كمالة!
لگاك سكويلة مجهدة ما نفعاتو قراية المسيد...!
الهربانة عليه مكمد ناقصاه كمالة!
لگاك سكويلة مجهدة ما نفعاتو قراية المسيد...!
من كان يلبس الحرير عاد بودربالة!
مابقى يسوى حلوى تسكت افام الگوالة!
هاواش ياخيي الترقاااع يرد الراشي جديد...!؟
مابقى يسوى حلوى تسكت افام الگوالة!
هاواش ياخيي الترقاااع يرد الراشي جديد...!؟
شحال من عودة حرانة هرسات الخيالة!
نسات لفشوش وعبرات الشعير والنخالة
إيييه يا دنيا...!
كيت اللي جات فيه كيف يتگعد ويزيد...!؟
نسات لفشوش وعبرات الشعير والنخالة
إيييه يا دنيا...!
كيت اللي جات فيه كيف يتگعد ويزيد...!؟
كيت اللي جات فيييه...!
كيف يتگعد ويزيييد...؟
كيف يتگعد ويزيييد...؟
ليست هناك تعليقات:
إرسال تعليق