" كان يا ما كان " بقلم نجاة احسايني

كان يا ما كان

مين كانت الارض خضرة
والرحبة واسعة
تلقى فيها لكبار والصبيان
تجري فيها لعواد والثيران
ترتع فيها لجديان ولغزلان
الخير موجود وكل شي مزيان
مين كانت الارض خضرة
والرحبة واسعة
تتنغم ب شدو الطيور
تتهنى بْ لَمان ف الديور
البركة كانت ب لفور
الهمة والشان فْ كل الامور
مين كانت الارض خضرة
والرحبة واسعة
كان صفي واشرب
الخير،الناس عليه تزرب
المنكر عليه تقاوم وتتجنب
والضمير مايتباع ولو ب الذهب
مين كانت الارض خضرة
والرحبة واسعة
وقت الضيق لمجمع يتلم
ف لحق كان يتكلم
للظلم ديما يهدم
او لعروق يجري فيها دم
مين كانت الارض خضرة
والرحبة واسعة
كانت الصحبة بلا غش
عليك نْسوّل ونفتّش
نوزن لكلام معاك بلا ما ندفش
نراعي حضورك وفْ ظهرك ما ننهش
مين كانت الارض خضرة
والرحبة واسعة
كانت لخاوة بلا خصومة
تراعي لبزّولة و لحشومة
خيري هو خيرك بلا لومة
يربطنا الدم والامومة
........
........
نجاة احسايني 3/5/2014