فْ خَاطَرْ لمّيمَة ......... من ديوان عيطة و كلام لفاطمة المسعودي

-------------------------
جْمَعت حَرف حرفْ
سْطر سطرْ
و نْظَمْتو كْلام 
عْلى مَنْولْ لَقْصِيدْ
--
فْ خَاطَرْ
دِيكْ اللّي بْنَات لِي
فْ قَلْبها قْصَرْ
عَشْت فيه أميرة
نَنْهِي وْ نَأْمَرْ
و عَاشت هِي مَنْ لَعْبِيدْ
--
ذِيكْ اللّي
نَحْتَتْ لِي مَنْ أحْلَامها جِسْر
مْشِيتِ عْليه بِاطْمِئْنَانْ
وَ صّلْني لْبَرْ لَمَان
و مازَالْ طَامْعَة
نمْشِي بْعِـــــــــــــــيد
--
ذِيكْ اللّي
فَرْشَت لِي الأرْض زْهَرْ
نَمْشِي فِيه بْلا مَا نَعْثر
وْ لَذْبَالْ
مَنْ دَمْهَا
مَنْ عْرُوقْها
تْنَبّتْ لِي وَرْد جْدِيدْ
--
ذِيكْ اللّي
عَاشَتْ كُلْ ايّامْهَا فْ الْقَهْر
مْرَكْبَة الْهَمْ مْرَدْفَة لَمْحَان
مْعَاونَة بَالصْبر
بَاشْ تْرُدْ أيّامِي كُلْهَا عِيدْ
--
ذِيكْ اللّي
عَلْمَتْنِي قِيمَة الصْبَرْ
وْ مَا نَحْسَدْ وَخّا حَقّي اصْغَرْ
عَلْمتْني مَا نَكْذبْ ما نَسْرقْ
قْبَلْ الْمَدْرَسَة وْ لَمْسِيدْ
--
ذِيكْ اللّي
حَرْثَتْ وْجَه الزْمَان بَالظْفَرْ
حَتّى الْمَحْصُول ثْمَرْ
حَصْدَاتُو
ذَرّاتُو
كْلَاتْ هِيَ النُّخَالَة
وَ كْلِيتْ انَا السْمِيدْ
--
ذِيكْ اللّي
هَزّتْنِي بِينْ الْعَيْن و الشْفَرْ
حَتْى عُودِي جْبَرْ
وَلّيتْ نَوْقَفْ
وَلّيتْ نْزِيدْ
--
ذِيكْ اللّي
حَمْلَتْنِي فَ الْكَرْش وَ الظْهَرْ
تْجُوعْ ... تَعْطَشْ
وْ مَنْ عرُوقْهَا تَعْصَرْ لِي
مَشْرُوبْ لَذِيذْ

--
هِي وَحْدَة مَا مَنْهَا اكْثَرْ
أَنَا نَعْرَفْهَا وَ انْتَ تعْرَفْهَا
حِيتْ عَيْشَاتَكْ امِيرْ
وْ هِيَ مَنْ لَعْبِيدْ
----------------- فاطمة المسعودي 5 رمضان 1437