يا داتي / زجلية بقلم بوجمعة الكمايري

يا داتي
يا لموشومه بلعذاب
شحال هبشتي
ونبشتي ف التراب
الا دخلتي جواك
لقاك السراب
معمر وساكن
فدانو يتراقص
بصابه خداعه
ولا تبعتي هواك
حجر وتراب
تطحن ف رحاك
والريح لي جا داك
هذا حساب
النفس الطماعه
أيه يا داتي
رضيتي تكوني
درجه للقدام
شاط منك الصواب
حتى تسميتي
مسلك ليام
واش من ايام
نهارك طويل
طول حبل
ف بير غارق
فيه الف gامه
ما توصل شربتو للفوق
حتى ليوم لقيامه
وليلك سارق
لكحل من عين عاشق
لعاشق كذاب
تياكل من لحباب
ساعه ورا ساعه
بحال اﻻ تياكل
 رزق ليتامه

الكمايري بوجمعة -سلا 17/01/2017