•~♧ لحسد ♧~• بقلم الشاعر الزجال الموهوب إبراهيم منتصر

لي بغا يورد يقصد الجابية

راه كلام المجدوب عسل مقطر

مكلوع G من شهدة ماهي خاوية
عسل حر من كل نبتة مجدر

كلام الشخضة ولمثول داوية
ماشي كلام قصيف ؤ مزعتر

لي ضحك يتبلى ويطيح ف الهوية
طلب التسليم ؤ قول الله يستر

رد بالك يا مول لكربةG والخابية
راه غير تقبة ف لقاع تخليك تهتر

عوافي لحسد تلهب كاديه G
ف الجوف لسانها يزهر

مالكي لسلهام الشر عارية؟
وصيتي ليك كمي السم و الغدر

مال بهوتك يا لمحيسيدة طاغية؟
وعايشة بين لعباد ب لفشر

وخا زريعتك يابسة خاوية
لسانك ماضي يقطع بحال لمناشر

مال سبولتك شامخة، وخا هي خاوية؟
غير جغلاف معمر مطامر

في خلوتك غير داوية
معاك العيشة حارة تقصر لعمر

ديما جامعة وطاوية
بان لعظم ؤ هرب منك لهبر

رفاكتكG ماشي مساوية
همك بين جنابك يقصر لعمر

خيمتك من لهنا خالية
وكل من عرفك هجر

يا العيفة علامن خافية ؟
وقرطاسك ف العين والشفر

عينك ترمي ف لقبور والعافية
وخلات مدون ودشر

حسدك جلابة وافية
وسهامها طيحت لبكر

ناري ميمتي منك عافية
بنادم في كرش مو خسر

* بقلم الشاعر الزجال : إبراهيم منتصر
* 28 غشت 2016
* مدينة سلا المغرب